படைத்தவன் இருக்கான் பார்த்துக் கொள்வான் - பயணத்தை தொடர்ந்து விடு - தைரியமூட்டுகிறார் ஸ்ரீஅன்னை

* மனிதனாகப் பிறந்த ஒவ்வொருவரும் இறைவாழ்வைப் பெற முயற்சிக்க வேண்டும். இப்படிச் சொல்வது சுலபம். ஆனால், அதை நடைமுறைப்படுத்துவது கடினம். இந்தக் கடினத்தைச் சுலபமாக்கிக் கொள்வது நம் கையில் தான் உள்ளது.

* இறைவனின் தொண்டனாக இருந்தால் மட்டும் போதாது. செய்யும் ஒவ்வொரு பணியையும் இறைவனுக்கே அர்ப்பணித்துக் கொள்ளவேண்டும். படைத்தவன் இருக்கிறான் என்றதைரியத்துடன், நம் வாழ்க்கைப் பயணத்தை தொடர வேண்டும்.

* "கடவுளே! நீ மட்டும் தான் எனக்கு வேண்டும்' என்று தெய்வத்திடம் உறுதிப்பாட்டுடன் சொன்னால், நீங்கள்  எப்போதுமே நேர்மையாக இருப்பதற்கான சூழ்நிலை அமையும்.

* மனம் ஒரு "பாலிஷ்' செய்த நிலைக்கண்ணாடி. அதனை தூய்மையாக வைத்துக் கொள்வதும், அதன் மீது தூசுபடியாமல் வைத்துக் கொள்வதும் நமது தொடர்ச்சியான பணியாகும்.

* சத்தியத்தின் இருப்பிடம் தான் இறைவன் இருக்குமிடம். சத்தியத்தையும் உண்மையையும் கடைப்பிடிப்பவனிடமே கடவுள் அருள் பரிபூரணமாய் இருக்கும்.

* வாழ்க்கையில் எது நடந்தாலும், எந்த முட்டுக்கட்டை தடுத்தாலும் இறைசிந்தனையை விடாது மேற்கொண்டவர்களுக்கு இறையருள் கிடைப்பது உறுதியாகும்.

* புறக்கணிக்கப்பட வேண்டிய மூன்று குணங்கள் ஒத்துழையாமை, கண் மூடித்தனம், இயலாமை ஆகியவை. வாழ்வின் சங்கடமான கட்டத்தில் விட்டுக்கொடுக்கும் குணமே, மனிதனைப் பாதுகாக்கப் போதுமானதாகும். 

* தன்னம்பிக்கையுடன் இருப்பவர்கள் நேர்மையுடன் பிரார்த்தனை செய்து தாங்கள் கேட்டதை இறைவனிடம் இருந்து தவறாமல் பெற்று விடுகின்றனர். நேர்மையுடன் இருப்பதும், தன்னைச் செம்மைப்படுத்திக் கொள்ளும் முயற்சியிலும் மேலும் நேர்மையை வளர்த்துக் கொண்டிருப்பதுமே நிறைவான தூய்மையாகும்.

* வாழ்வின் உண்மையான நோக்கம் இறைவனுக்காக வாழ்தலாகும். அல்லது உண்மைக்காக வாழ்தல் குறைந்த பட்சம் தனது ஆன்மாவுக்காகவாழ்தலாகும்.

* நம்முடைய எண்ணங்கள் இறைவனை நோக்கித் திரும்பும்போதும், நம்மையே இறைவனுக்கு 

அர்ப்பணித்துக் கொள்ளும் போதும், அனைத்து செயல்களும் அழகாகவும் மாட்சிமிக்கதாகவும், எளிமையாகவும், அமைதியாகவும் மாறிவிடுகிறது.

* தியானத்தின் மூலம் ஒருவன் ஒருபங்கு தான் முன்னேற முடியும். ஆனால் நேர்மையாகத் தன் பணிகளைக் கண்ணும் கருத்துமாகச் செய்பவன் வாழ்வில் பத்து மடங்கு முன்னேற்றம்  காண்பான்.

* இறைவனின் சொற்கள் ஆறுதலையும், பேரின்பத்தையும், இதத்தையும் அளித்து ஒளியூட்டுகின்றன. இறைவனின் கருணைக் கரங்கள் எல்லையில்லா ஞானத்தை மறைக்கின்ற திரையை விலக்குகின்றன.

* இறைவன் அனைத்து மனிதர்களையும் ஒன்று போலவே நேசிக்கிறான். ஆனால், பெரும்பாலான மனிதர்களின் உணர்வு இருண் டுள்ளதால் தெய்வீக அன்பை அவர்களால் உணர முடிவ தில்லை.